Fréttir 2026
21/07 2026
Elín H. Jónsdóttir ráðin framkvæmdastjóri Eignarhaldsfélagsins Brunabótafélag Íslands
Stjórn Eignarhaldsfélagsins Brunabótafélag Íslands (EBÍ) hefur ráðið Elínu H. Jónsdóttur í starf framkvæmdastjóra félagsins. Elín býr yfir víðtækri reynslu af fjármálamarkaði, eignastýringu og stjórnarstörfum. Hún starfar nú við lagadeild Háskólans á Bifröst, þar sem hún hefur gegnt starfi deildarforseta og starfar nú sem lektor. Þar kennir hún meðal annars fjármálamarkaðsrétt, félagarétt og stjórnarhætti, auk námskeiða á sviði sjálfbærni og samfélagsábyrgðar fyrirtækja. Elín starfaði áður sem m.a. framkvæmdastjóri eignastýringarsviðs Íslandsbanka, forstjóri Bankasýslu ríkisins og framkvæmdastjóri Arev verðbréfafyrirtækis. Þá hefur hún gegnt formennsku í stjórnum Borgunar hf., Tryggingamiðstöðvarinnar hf. og Regins hf., auk þess að hafa setið í stjórn Landsbankans hf. Elín er með Cand. Jur. próf frá Háskóla Íslands, LL.M. gráðu frá Duke University School of Law og MBA gráðu frá Stockholm School of Economics. Að mati stjórnar hefur Elín þá menntun, reynslu og hæfni sem þarf til að leiða starfsemi félagsins áfram. Sérstaklega var horft til víðtækrar reynslu hennar af fjármálum, fjárfestingum, eignastýringu og stjórnarháttum. Stjórn Eignarhaldsfélagsins Brunabótafélag Íslands býður Elínu H. Jónsdóttur velkomna til starfa og hlakkar til samstarfsins.
22/04 2026
Starf framkvæmdastjóra EBÍ
Eignarhaldsfélagið Brunabótafélag Íslands (EBÍ) leitar að öflugum og ábyrgum framkvæmdastjóra til að leiða starfsemi félagsins.
Sjá nánar hér á vef Hagvangs.
07/04 2026
Úthlutun úr Styrktarsjóði EBÍ lokið
Nýlega úthlutaði stjórn EBÍ styrkjum til 15 verkefna í jafn mörgum sveitarfélögum, samtals kr. 8 milljónir. Styrktarsjóður EBÍ hefur verið starfræktur frá árinu 1996. Samtals hefur verið úthlutað styrkjum að upphæð 245 milljónir að núvirði til 345 verkefna víðsvegar um landið. Umsóknarfrestur er til loka febrúarmánaðar ár hvert og hvetjum við aðildarsveitarfélög EBÍ að sækja um í sjóðinn.
Lista yfir úthlutanir sjóðsins frá upphafi er að finna hér.
20/03 2026
Ársreikningur EBÍ
Á fundi sínum þann 13. febrúar sl. samþykkti stjórn EBÍ ársreikning vegna ársins 2025. Heildartekjur félagsins voru um 171 milljón og rekstrargjöld 117 milljónir. Áfallinn fjármagnstekjuskattur á árinu var 39,6 milljónir og hagnaður félagsins því 13,6 milljónir. Heildareignir félagsins eru tæpir 2,9 milljarðar og eigið fé um 1,7 milljarðar.
Ársreikninginn í heild sinni má sjá hér.
Nafnávöxtun eigna félagsins var jákvæð um 6,14% og raunávöxtun var 2,36%. Allir eignaflokkar skiluðu jákvæðri ávöxtun nema innlend hlutabréf. Stærsti hluti eignasafns félagsins, eða um 58%, eru skuldabréf og innistæður með ábyrgð ríkissjóðs og sveitarfélaga en síðan eru það erlend hlutabréf sem eru um 10,6% af eignasafninu og innlend hlutabréf eru um 9,5 % safnsins.
20/03 2026
Fjárfestingastefna EBÍ
Fjárfestingastefna Eignarhaldsfélagsins Brunabótafélag Íslands fyrir árið 2026 var samþykkt í stjórn EBÍ þann 13. febrúar sl.
Örlitlar breytingar voru gerðar á stefnunni frá fyrra ári sem fólust í því að hlutur ríkistryggðra bréfa var aukinn en eignaflokkurinn Sértryggð skuldabréf lækkaði á móti. Var breytingin 2%.
Áfram er það meginmarkmið stefnunnar að EBÍ standi undir skilgreindum markmiðum um árlega útgreiðslu ágóðahlutar til aðildarsveitarfélaga EBÍ. Stjórn félagsins er falið að ákveða endanlega upphæð ágóðahlutarins en við ákvörðun hans skal hafa í huga að lágmarkaðar séu líkur á því að skerða þurfi höfuðstól á milli ára.
Eignastýringu félagsins er úthýst til þriggja fjárvörsluaðila sem allir vinna eftir fyrir fram skilgreindum fjárfestingastefnum.
Fjárfestingastefnu félagsins í heild sinni má nálgast hér.